香港婚禮Live Band熱門進場歌曲推薦｜FATI LIVE BAND幫你揀最啱嘅歌
- 6天前
- 讀畢需時 3 分鐘
結婚大日子，新人進場嗰一刻，全場目光都集中晒喺你哋身上。如果呢個時候有隊婚禮Live Band現場奏起一首恰到好處嘅音樂，成個氣氛即刻唔同晒，浪漫到爆！不過婚禮進場歌到底應該點揀？邊啲歌最受香港新人歡迎？等FATI LIVE BAND話你知2026年嘅熱門推介。
婚禮嘅進場音樂
講到婚禮嘅進場音樂，可以話係全場第一個高潮位。你哋由門口行到上台嗰段路，所有賓客嘅目光都望住你哋，背景音樂嘅選擇直接影響成個場嘅氣氛同情緒。一首好嘅進場歌，可以令賓客即刻投入你哋嘅婚禮，甚至感動到眼濕濕。好多有經驗嘅香港婚禮樂隊都會建議新人，跟據婚禮嘅唔同環節好似進場、證婚、祝酒、切蛋糕咁，逐個同樂隊夾清楚，確保音樂同流程可以完美配合。
英文歌
如果你哋鍾意經典同優雅嗰種感覺，英文歌入面有好幾首係香港婚禮進場嘅長青熱門。好似貓王嘅《Can’t Help Falling in Love》，旋律溫柔又浪漫，係好多新人嘅進場首選，無論用咩樂器演繹出嚟嘅效果都同樣動人。Ed Sheeran嘅《Perfect》近年橫掃全球婚禮市場，歌詞講緊搵到完美伴侶嗰種甜蜜，用嚟襯托婚禮氣氛一流。電影《吸血新世紀》嘅主題曲《A Thousand Years》，旋律充滿期盼同深情，好啱新娘進場時演奏，營造到成個夢幻感覺出嚟。仲有迪士尼《獅子王》嘅經典插曲《Can You Feel The Love Tonight》，浪漫得嚟仲帶少少溫馨，好多新人由細聽到大，對佢哋嚟講別具意義。
廣東歌
想令在場嘅親朋戚友更加投入嘅話，揀廣東歌就一定冇得輸。聽到熟悉嘅母語歌詞，好多賓客都會忍唔住跟住唱，成個氣氛即刻唔同晒。周柏豪嘅《我的宣言》歌詞講緊願意為對方奉獻一生嘅承諾，好適合進場或者證婚嗰陣用，近年成為婚禮廣東歌嘅大熱之選。王菀之嘅《好時辰》歌詞充滿感恩，「遇上你 太感恩 不遲亦不早」，甜蜜得嚟又好感動。張學友嘅《你的名字我的姓氏》就經典到唔使多介紹，將對方嘅名字冠上自己嘅姓氏，正正就係婚姻嘅最佳寫照。陶喆嘅《愛很簡單》雖然係國語歌，但香港新人都好鍾意，旋律輕快歌詞直接，好易令人投入。
古典音樂
如果你哋嘅婚禮喺教堂或者比較莊重嘅場地舉行，古典音樂就可以營造到典雅高貴嘅氣氛。大家成日聽到嗰首《Bridal Chorus》新娘進場曲，傳統婚禮必備，一奏起全場就會肅立，非常有儀式感。Pachelbel嘅《Canon in D》幾乎係婚禮音樂嘅代名詞，不過有樂隊就講過十個客有九個都揀呢首，如果想特別少少，可以考慮Elgar寫俾未婚妻嘅作品《Salut d’Amour》（愛的禮讚），曲名本身就充滿愛意，比起《Canon in D》更加有心思。
迪士尼
如果你哋係迪士尼粉絲，揀返首迪士尼歌做進場一定夠晒夢幻。《阿拉丁》主題曲《A Whole New World》象徵新人展開全新嘅人生旅程，浪漫之餘又充滿希望。《小美人魚》插曲《Part of Your World》旋律優美，同樣係熱門之選。另外宮崎駿動畫嘅音樂一樣咁受歡迎，尤其係由久石讓創作嘅作品，旋律優美得嚟仲有種純真嘅感覺，特別適合戶外或者主題婚禮，好似《龍貓》主題音樂同《哈爾移動城堡》嘅《人生的旋轉木馬》都係好選擇。
最後
最後提返幾樣嘢，揀歌嗰陣記得睇清楚歌詞講乜，唔係首情歌都啱婚禮播㗎，有啲表面浪漫但其實講緊分手嘅歌就一定要避開。同埋大多數婚禮樂隊都會有自己嘅歌單俾你揀，如果你想唱嘅歌唔喺歌單入面，記住問清楚會唔會有額外嘅編曲費用。一般三小時嘅婚宴Live Band大約會演奏三十首歌左右，你可以將唔同環節嘅歌分類好，方便樂隊同場地工作人員跟住流程播放。其實揀進場歌最重要嘅係揀一首對你哋有特別意義嘅歌，無論係第一次約會聽到嘅、定係一齊鍾意嘅電影歌曲，只要係屬於你哋兩個嘅歌，就係最好嘅婚禮Live Band曲目！
香港頂級 Wedding Live Band 推介
FATI LIVE BAND
電子郵件:
查詢熱線: +852 6502 9650
